GENSAN- Nag-andam na ang Department of Education-Gensan sa posibleng pagpatuman sa mga alternatibong pamaagi sa pagpanudlo samtang nagpadayon ang pag-ayo sa mga eskwelahan nga naapektuhan sa linog.
Sumala kang Kenneth Carisma, Division Information Officer sa DepEd Gensan, kasagaran sa mga eskwelahan anaa sa maayong kahimtang apan adunay pipila ka mga building nga dili na mahimong magamit tungod sa kadaot nga natala.
Tungod niini, giandam na sa DepEd ang mga ginikanan ug mga estudyante sa posibilidad sa shifting classes, modular learning, ug online classes kon gikinahanglan.
Matod niya, gamiton pag-usab ang mga Alternative Delivery Modes nga napatuman kaniadto sa panahon sa pandemya aron masiguro nga dili maputol ang pagkat-on sa mga estudyante.
Gipasabot usab ni Carisma nga kini nga mga lakang ipatuman lamang samtang nagpadayon ang rehabilitasyon ug pag-ayo sa mga classroom nga adunay minor damage hangtod nga makabalik na sa normal nga operasyon ang tanang eskwelahan.
