Gitugotan na karon sa Department of Education (DepEd) ang mga ginikanan o guardians nga makasumite sa birth certificate sa estudyante kausa lang sa tibuok K-12 nga edukasyon.
Si DepEd Secretary Sonny Angara nagkanayon niadtong Sabado nga kini aron mapadali ang enrollment sa mga tinun-an ug malikayan ang pagkalangay sa pagpasulod sa mga bata tungod sa kakuwang sa mga dokumento.
Base sa revised guidelines sa ahensya, kinahanglang isumiter ang orihinal o certified true copy sa birth certificate sa bata nga gi-issue sa Philippine Statistics Authority (PSA).
Kung walay birth certificate sa panahon sa pagpalista, ang ubang mga dokumento sama sa National ID, persons with disability (PWD) ID, o PhilHealth ID mahimong isumite hangtod sa Oktubre 31.
Hinuon, ang PSA-issued birth certificate kinahanglan gihapon nga isumite kung kini magamit na, dugang sa DepEd.
