GENERAL SANTOS CITY – Positibo ang DepEd 12 nga mas musaka pa ang ranking sa Palarong Pambansa sa sunod tuig nga matigayon sa San Jose Occidental Mindoro (Region 4-B).
Kini ang gibutyag sa Bombo Radyo ni Jojo Duhilag, Physical Education Sports Supervisor sa DepEd 12, gumikan nasay0d na matud pa sila sa technique nga angayang himuon, nga maoy nahimong liyawe sa maayong performance sa SOCCSKSARGEN Warriors sa dili pa lamang dugay nahuman nga Palarong Pambansa 2019 sa Davao City.
Kahibaluan nga nakab-ot sa Region 12 ang target nga 4th place sa palaro human mihakot ang Soccsksargen ug 26 gold, 43 silver ug 40 bronze medals.
May tulo ka atleta usab nga nahimong record-breaker, hinungdan nga gikonsidera kini ni DepEd 12 Regional Director Allan Farnazo isip best performance sa Region 12 sa Palarong Pambansa.
Nagbunga matud pa ang 35 ka adlaw nga training camp sa tanang mga atleta sa Region 12. Sa karon, target matud pa nila nga ang mga events nga nakakuha ug silver ning tuiga ang mahimo nang gold medal sa sunod tuig nga Palaro.
Kahibaluan nga base sa overall ranking sa Palarong Pambansa 2019, kampeon ang NCR nga may 82 golds, 70 silvers, ug 54 bronze medals. First runner-up ang CALABARZON nga may 63 golds, 48 silvers, ug 69 bronze medals. Second runner-up ang Western Visayas nga may 47 golds, 34 silvers, ug 57 ka bronze medals.
Samtang, sa special awards, kampeon ang SOCCSKSARGEN Warriors isip Most Organized Delegation.
