GENSAN – Nagpahibalo ang Department of Agriculture (DA) sa paghatag ug ₱180 milyon nga pondo gikan sa General Appropriations Act (GAA) alang sa Farm-to-Market Road Development Program sa siyudad. Ang proyekto nagtinguha sa pagpalig-on sa agrikultura ug pagpausbaw sa kabuhayan sa mga lokal nga mag-uuma pinaagi sa mas hapsay ug episyenteng transportasyon sa ilang mga produkto padulong sa merkado.
Sumala sa opisyal nga pahibalo, magtinabangay ang DA ug ang Local Government Unit (LGU) sa General Santos aron masiguro ang hapsay ug maayong implementasyon sa proyekto. Kini usa ka lakang nga nagpakita sa kooperasyon sa national ug local government alang sa kalambuan sa sektor sa agrikultura sa syudad.
Ang makasaysayanong pulong gipahigayon uban sa presensya sa City Agriculture Office, City Planning Office, City Engineering Office, ug ni Executive Assistant III Dave Homo. Sa maong tigum, gitan-aw ug giplano ang mga detalye sa proyekto, lakip na ang ruta sa mga kalsada, oras sa konstruksyon, ug koordinasyon sa mga komunidad nga maapektuhan.
Gilauman nga pinaagi sa Farm-to-Market Road Development Program, mas madali ang pagdala sa mga produkto sa merkado, mapakunhod ang gasto sa transportasyon, ug mas mapalambo ang kita sa mga mag-uuma. Kini usab usa ka dakong oportunidad aron mapalig-on ang ekonomiya sa General Santos ug sa tibuok rehiyon.
