GENERAL SANTOS CITY – Nakadayeg si Jojo Duhilag, Physical Education Sports Supervisor sa DepEd 12, sa maayong pag-welcome sa Vigan City, ang host sa Palarong Pambansa 2018, sa delegasyon sa SOCCSKSARGEN.
Sa pakighinabi sa Bombo Radyo, gibutyag ni Duhilag nga pag-abot nila sa ilang billeting area, andam ng daan ang mga foam ug unlan, samtang ang ubang lawak ang de-aircon pa.
Maayo usab matud pa ang pagkaon, ug impresibo gayud ang pag-akomodar kanila.
Samtang, sa ilang pag-abot nakasinati sila ug init nga panahon, apan wala kini nahimong problema gumikan naanad ang mga atleta sa init nga panahon sa Koronadal, kaniadtong nagbansay pa.
Hinungdan nga gihatagan ug paigong tubig ang mga atleta, apan sa kinatibuk-an, wala silay nasinatian nga problema didto, gumikan anaa ang tanan nilang kinahanglan.
Sa karon, andam ug naghinam-hinam na matud pa ang mga atleta sa SOCCSKSARGEN alang sa pagsugod sa torneyo, ug positibo nga mamahimong malampuson ning tuiga.
Gibutyag pa ni Duhilag nga usa sa ilang ginatan-aw nga makahatag ug gold medal sa Region 12 mao ang gymnastics.
