Gibalibaran sa Department of Environment and Natural Resources (DENR) ang mga alegasyon nga migamit kini og pesticide gas batok sa mga raliyista human sila nagpahigayon og protesta atubangan sa ilang opisina sa Quezon City.
Matud sa ahensya, ang mist nga nakita sa lugar gikan sa ilang regular nga defogging activity matag Domingo ug wala kini gamita aron papahawaon ang mga nagprotesta.
Gipasabot sa DENR nga nagsunod lamang sila sa workplace hygiene standards ug wala sila mogamit og bisan unsang kemikal alang sa crowd control.
Una nang giakusahan sa pipila ka progresibong grupo gikan sa Southern Tagalog ang DENR nga matod pa nagpagawas og pesticide atol sa ilang protesta sa Visayas Avenue niadtong Hulyo 26 isip kabahin sa ilang caravan sa wala pa ang State of the Nation Address (SONA) ni Pangulong Ferdinand Marcos Jr.
Misupak ang mga raliyista sa pipila ka mga proyekto ug polisiya sa gobyerno nga, sumala kanila, makadaot sa kalikupan, ilabina sa kabukiran, ug maoy hinungdan sa pagpahawa sa pipila ka mga komunidad.
Gikondena usab nila ang ilang gitawag nga “pekeng kauswagan,” o mga proyekto nga, matud nila, mas nakapahimulos ang dagkong negosyante ug mga interes sa langyaw.
Bisan pa sa ilang reklamo kabahin sa mist, gipadayon gihapon sa mga nagprotesta ang ilang programa, lakip ang pagpakalbo, nga ilang gihimong simbolo sa pagsupak sa padayon nga pagkaguba sa mga kalasangan.
