GENSAN – Nabahin ang reaksyon sa Amerika human sa kontrobersyal nga pagdakop sa Presidente sa Venezuela nga si Nicolás Maduro, matud ni Bombo International Correspondent Luisa Milone.
Si Maduro, ang nagdumala sa Venezuela sukad pa 2013, nadakpan sa usa ka military operation sa US forces sa Caracas ug gidala paingon sa Estados Unidos.
Ang gobyerno sa Washington miingon nga ang pagdakop bahin sa mga kriminal nga kaso batok kaniya, lakip ang drug trafficking ug narco‑terrorism nga mga akusasyon, ug gipahamtang usab ang tensiyon tali sa duha ka nasod.
Matud pa ni Milone, ang mga Democratiko sa Amerika adunay halo nga reaction sa maong aksyon: ang uban nalipay sa potensyal nga pag‑untag sa usa ka lider nga gihulagway nila nga diktador, apan ang uban nagpakita og kabalaka ug kritikal sa ligalidad ug internasyonal nga epekto sa operasyon.
Sa pikas bahin, daghang Republikanhong mga lider ug mga supporters ang solid ang suporta sa gihimong lakang ni Presidente Donald Trump, nga nagtan-aw niini nga usa ka tinuod ug kinahanglanon nga lakang batok sa usa ka lider nga ilang giakusahan sa kalapasan ug pagdaot sa seguridad sa hemispero.
Ang pagdakop ni Maduro usa ka talagsaon ug kontrobersyal nga panghitabo nga nakahatag og lain‑laing opinyon sa sulod sa Estados Unidos ug sa tibuok kalibutan, samtang padayon ang global debate sa ligalidad sa aksyon ug ang umaabot nga papel sa Amerika sa politika sa Latin Amerika.
