Giabrihan sa testigong si National Bureau of Investigation (NBI) Senior Agent John Mark Calilung ang usa ka flash drive nga adunay sulod nga video kabahin sa giingong pagpanghulga ni VP Sara Duterte batok kang Pangulong Ferdinand Marcos Jr.
Gusto sa prosecution panel nga kutob lamang sa duha ka minuto ang ipasalida nga bahin sa video, apan gisupak kini sa defense panel.
Giinsistir sa depensa nga kinahanglan ipakita ang tibuok video aron makita ang kompleto nga konteksto sa maong pahayag.
Pangunang sulod sa video mao ang pahayag ni VP Sara sa usa ka press conference diin iyang giingon nga aduna na siyay nakaistorya nga mopatay kang PBBM kung adunay mahitabo kaniya.
Gisuportahan usab ni Senador Alan Peter Cayetano ang mosyon sa depensa nga ipasalida ang tibuok video.
Matod ni Cayetano, mas gusto niyang makita ang kompleto nga video kay dili siya gusto nga maputol ang pagsabot kung duha ka minuto lamang ang ipakita sa Senate Impeachment Court.
