Death toll sa suicide bombing sa mosque sa Pakistan, nisaka na sa 32, 160 angol

Nisaka na sa 32 ang ihap sa mga namatay ug kapin sa 160 ang nasamdan sa usa ka suicide bombing sa usa ka Shiite Muslim mosque sa Islamabad, ang kapital sa Pakistan.

Giangkon sa Islamic State ang responsibilidad sa pag-atake ug gilakip ang ngalan ug litrato sa giingong suicide bomber sa mga post sa online messaging app (Telegram).

Sumala sa IS, ang suicide bomber mipusil sa mga guwardiya nga misulay sa pagpahunong kaniya sa wala pa mobuto ang iyang explosive vest.

Sa usa ka pahayag, ang grupo nagpasidaan nga daghang mga pag-atake ang mosunod.

Kini giisip nga labing makamatay nga pag-atake sa Pakistan sukad Enero 2023, sa dihang gibombahan ang usa ka mosque sa amihanan-kasadpang lungsod sa Peshawar, nga nakapatay sa kapin sa 100 ka mga tawo.