Misaka na sa 16 ang ihap sa namatay gikan sa ikaduhang adlaw sa away tali sa Thailand ug Cambodia. Samtang kapin sa 100,000 ka mga tao ang gipabakwit sa mga evacuation center gikan sa border tali sa duha ka nasud.
Gipasidan-an usab sa Thailand nga ang panagbangi niini sa Cambodia mahimong mosangko sa gubat.
Ang panagsangka tali sa duha ka mga nasud unang miulbo niadtong Hulyo 24 human ang Cambodia naglunsad og pag-atake gamit ang small arms ug heavy weapons, nga nag-aghat sa Thai army sa pagbalos pinaagi sa artillery fire.
Ang panagsangka nahitabo sa duha ka lokasyon sa Ubon Ratchathani province ug usa sa Surin province, sumala kana sa impormasyon gikan sa Thai Army.
Gipahimangnoan usab sa militar ang mga lungsuranon niini nga likayan ang lugar tungod sa mga taho sa mga heavy weapons ug mga rocket nga gipabuto gikan sa Cambodia.
Kini nagtimaan sa usa ka dramatikong pagsaka sa tensyon tali sa duha ka mga nasud nga nag-ambit sa usa ka utlanan sa yuta nga kapin sa 800 ka kilometro.
Ang duha ka mga nasud adunay dugay na nga panaglalis sa utlanan nga naggikan sa usa ka 1907 nga mapa nga gilaraw sa panahon sa kolonyal nga pagmando sa Pransya nga gigamit sa pagbulag sa Cambodia gikan sa Thailand.
Gigamit sa Cambodia ang mapa, isip basihan sa pag-angkon sa teritoryo niini, apan wala kini giila sa Thailand, nga nag-insistir nga kini dili tukma.
Daghang mga nasud ang nag-awhag sa Thailand ug Cambodia nga hunongon ang away, lakip ang Estados Unidos, China, Australia ug Association of Southeast Asian Nations (ASEAN).
