GENERAL SANTOS CITY- Gibutyag ni Atty. Jose Villanueva, Assistant Regional Director sa Commission on Elections (COMELEC) Region 12, nga ang tanang kandidato nga miapil sa May 12, 2025 midterm elections napildi man o midaog ang may obligasyon nga pagsumite sa ilang Statement of Contributions and Expenditures (SOCE).
Gipahimangnuan ni Atty. Villanueva nga ang tanang kandidato gikinahanglan nga makompleto ug mapasaka ang ilang SOCE sulod sa 30 ka adlaw pagkahuman sa eleksyon, nga ang gikatakdang deadline sa Hunyo 11, 2025.
Gipaklaro sa maong opisyal nga ang maong proseso dili lamang sa mga napiling kandidato, apan lakip usab ang mga napildi, tungod kini usa ka mandato sa balaod ilawom sa Omnibus Election Code ug sa Republic Act No. 7166.
Ang SOCE ang usa ka dokumento nga nakalatid ang tanang pinansyal nga transaksiyon sa kandidatura lakip ang nadawat nga mga donasyon ug gigastong pondo atol sa kampanya.
Gipasabot ni Villanueva nga kini nga dokumento nagsilbing pundasyon sa transparency ug integridad sa eleksyon.
Gipahimangnuan usab ang mga kandidato nga ang kapakyas sa pagsumite sa SOCE mahimong musangpot sa mga legal nga proseso, lakip ang posibleng diskwalipikasyon sa umaabot nga kandidatura o dili pag-isyu sa Certificate of Proclamation sa mga midaog nga kandidato.
