Gihagit ni kanhi Senadora Leila de Lima si President Ferdinand “Bongbong” Marcos Jr. nga buhaton ang iyang gipamulong ug ipakita ang tinuod nga baruganan batok sa korapsyon pinaagi sa matinud-anon nga aksyon, dili lang mga pasalig sa mikropono.
Kini human sa giingong isyu sa mga ghost flood control projects nga giangkon sa presidente atol sa iyang State of the Nation Address (SONA), diin iyang gisulti nga panubagon ang mga korap nga opisyal nga nalambigit sa mga proyekto nga may nakita nga anomalya.
Giingon pa ni De Lima nga ang pakigbatok sa korapsyon dili angayang magpili ug kalaban.
Iyang gidasig ang gobyerno nga maglusad og independent ug transparent nga imbestigasyon, ug siguruhon nga mapanubag ang tanang nalambigit, bisan pa kinsa pa man sila.
Gipadayag ni De Lima nga ang korapsyon maoy usa sa pinakadakong babag sa kalamboan.
