Gipaneguro sa Department of Budget and Management nga igo ang pundo sa gobyerno alang sa sunod nga mga kalamidad nga moigo sa atong nasud.
Matud pa ni Budget Secretary Aminah Pangandaman, daghan ang tinubdan sa pundo sa gobyerno busa walay angay ikabalaka ang publiko.
Ang kalihim nihimo sa katin-awan human ang mga kritiko sa administrasyon niingon nga ang pundo sa gobyerno sa pagtubag sa umaabot nga mga katalagman nagkahurot.
Kadaghanan sa mga kritiko nagkonektar sa sunodsunod nga mga bagyo ug EL Niño phenomenon nga nakaapekto sa nasud sa kamatuoran nga nahurot na ang pundo sa gobyerno.
Gipasabot sa kalihim nga moabot sa ₱30 bilyones ang Quick Response Fund sa nagkalain-laing ahensya sa gobyerno nga naglakip sa DSWD, DPWH, DA, DEPED, DILG, PNP, DOTR, BFP, OCD ug DOH.
Giklaro sa opisyal nga aduna pay ₱7 bilyon nga QRF nga nahabilin alang sa mga ahensya nga magamit sa ilang mga paningkamot sa pagtubag sa kalamidad.
Kini nga kantidad nabilin gikan sa mga pondo nga gipagawas agig tubag sa mga bagyo nga Kristine, Leon, ug Marce.
Ang ₱7 bilyon nga pundo mahimong makuha gikan sa Unprogram Appropriation, Contingent Fund, ug Local Government Support Fund.
