GENSAN – Andam na ang dakbayan sa General Santos sa pag-host sa 2025 Batang Pinoy Games nga ipahigayon sugod Oktubre 25 hangtod 30 karong tuiga.
Gilauman nga kapin sa 15,000 ka mga atleta gikan sa tibuok Pilipinas ang mosalmot sa maong national youth sports competition.
Sumala sa lokal nga kagamhanan, P16 milyones ang gitagana alang sa pagpangandam ug kalampusan sa maong sporting event.
Sa maong budget, P11.7 milyones ang gihatag alang sa grand opening ug closing ceremonies nga ipahigayon sa dakbayan.
Lakip sa opening ceremony ang pasundayag sa mga sikat nga artist sama nila Dionela, TJ Monterde, o KZ Tandingan, uban sa usa ka pyromusical display nga makapabunggah sa pagsugod sa dula.
Ang mga local talents ug performers nga miapil na sa national TV competitions giimbitar usab aron mopakita sa ilang abilidad atol sa opening salvo.
Samtang sa closing ceremony sa Oktubre 30, gikatakda nga mopasundayag ang usa sa mga iladong Pinoy singers sama nila JROA, Zach Tabudlo o Skusta Clee aron ipasira ang tibuok kalihokan.
Gilauman usab ang pag-abang og 55 ka units sa portalets nga nagkantidad og P4.4 milyones nga ipakatap sa mga tunghaan nga magsilbi nga billeting quarters sa mga delegado sulod sa pito ka adlaw nga kompetisyon.
Sa laing bahin, si Philippine Sports Commission (PSC) Commissioner Olivia “Bong” Coo mopahigayon og ocular inspection karong semanaha aron personal nga tan-awon ang kahimtang sa mga pasilidad ug billeting quarters nga gamiton sa mga contingents.
