GENERAL SANTOS—Kulang gayud ang mga nurse sa ospital sa gobyerno sa Gensan hilabina sa kasamtangang sitwasyon nga nag-atubang sa pandemya sa Covid 19.
Kini ang giangkon ni Dr. Ryan Aplicador, Hospital Chief sa Dr. Jorge P. Royeca Hospital. Giklaro nga ang kakulangon sa mga nurses sa maong tambalanan dili buot pasabot nga nawad-an na sila ug mga nurses.
Dugang ni Dr. Aplicador nga usa sa hinungdan nganong hangtod karong panahona wala pa silay na-hire ug walay nag-apply tungod sa K-12 nga programa sa gobyerno kung asa daghan pa ang wala migradwar gumikan sa pagdugang ug tuig sa pag-eskwela.
Sa pamahayag sa nasampit, daghan na sa mga licensed nurse ang nanarbaho sa ubang nasud kung asa dagko kaayo ang suweldo nga layo kaayo sa ginadawatan nga suweldo sa nasud.
Nanghinaot na lamang si Dr. Aplicador nga bisan madungagan lang sila ug 20 aron usab nga mogaan-gaan ang ilang trabaho.
