GENERAL SANTOS CITY – Daghan na matud pa ang nag-atras nga miyembro sa KAPA kon Kabus Padatu-on.
Kini ang gipaabot nga impormasyon sa usa sa taga gobyerno nga wala nagpaila sa iyang pangalan. Ang uban nga mga kauban niini sa trabaho ang wala na midayon aron magpa-miyembro sa KAPA dihang nadunggan sa pagbatbat sa Bombo Radyo nga kini usa ka pyramiding scam.
Gibutyag sa nahisgutan, may kauban siya sa trabaho nga nagplano nga bawion na ang P10,000 nga gibutang sa KAPA.
Gikadugang pa, iyang nadunggan gikan sa mga katrabaho nga gibati sila og kakulba nga basin dili na mabalik ni KAPA founder Joel Apolinario ang ilang salapi luyo nga sa sinugdanan pa lamang nasayod na sila nga ilaha kining gihatag nga donasyon sa KAPA.
Sumala pa, gipasiatab karon sa kauban niini sa trabaho nga si certain Ruby, nga taga Malungon ug recruiter matud pa sa KAPA nga 40 porsyento na matud pa ang ihatag nga tubo ni Apolinario sa mga miyembro sunod nga tuig.
Gipamugos usab sa ilaha nga gihatagan matud ni Apolinario si Bombo Janjan Macailing og P200,000 apan wala siya mituo dungan pagsaywar sa recruiter nga wala kiniy kamatuoran nga napamatud-an sa padayong pagbatbat sa sibyahanan batuk sa KAPA magkina-unsa man.
Nagtuo nga dili madugay mabisto ra ang hinimuan ni Apolinario tungod mugawas gyud ang kamatuoran.
