Nagapangita og dugang nga mga paagi ang Department of Agriculture (DA) aron mapugngan ang sakit nga dugay nang nakababag sa industriya sa saging sa Pilipinas.
Sumala kang Agriculture Undersecretary Philip Young, usa sa ilang gipunting karon mao ang pagtabang sa mga mag-uuma sa saging nga naapektuhan sa Panama disease o Fusarium wilt, nga halos 20 ka tuig nang naghulga sa industriya.
Matud pa ni Young, tungod sa maong sakit, nahulog ang Pilipinas gikan sa ikaduhang pwesto ngadto sa ika-upat isip labing dako nga exporter sa saging sa kalibutan niadtong 2024.
Aron masulbad kini, nagplano ang DA nga makigtambayayong sa usa ka kompanya nga nakabase sa Singapore aron sulayan ang bag-ong teknolohiya nga posibleng makatabang sa pagpugong sa sakit sa saging.
Gilauman nga mapirmahan ang Memorandum of Understanding (MOU) alang niini sulod ning buwana.
Plano usab sa DA nga magtukod og trial farm alang sa saging ug mangga nga pagadumalahan sa Bureau of Plant Industry (BPI).
Base sa Food and Agriculture Organization (FAO) sa United Nations, nakabawi ang Pilipinas ug mibalik sa ikaduhang pwesto isip ikadakong exporter sa saging sa kalibutan niadtong 2025.
Bisan pa niini, gipasiugda ni Young nga dili lamang produksiyon ang angay tutukan kondili usab ang pagpalapad sa merkado sa mga produktong Pilipino ug pagpalig-on sa kompetisyon sa nasud sa internasyonal nga merkado, lakip ang pagsulbad sa mga isyu nga may kalabutan sa taripa.
Sumala pa sa FAO, misaka og 25.6 porsiyento ang banana exports sa Pilipinas niadtong 2025, nga miabot sa 2.93 milyon ka metric tons.
