Gilauman sa Department of Agriculture (DA) nga maaprobahan na ang bakuna kontra African Swine Fever (ASF) sa ikatulong quarter karong tuiga aron masugdan na ang commercial rollout o opisyal nga pagbaligya niini sa merkado.
Ang target nga maaprobahan mao ang AVAC live vaccine nga gikan sa Vietnam ug kasamtangang gi-review pa sa Bureau of Animal Industry (BAI).
Sumala kang Agriculture Assistant Secretary Arnel de Mesa, kung mahatagan na kini og aprobasyon alang sa komersyal nga paggamit, mahimo na kini ibaligya sa mga rehistradong outlet sa tibuok nasod.
Base sa pinakabag-ong datos sa BAI, adunay aktibong kaso sa ASF sa pito ka probinsya sa lima ka rehiyon hangtod Hunyo 5. Lakip niini ang Pangasinan, Romblon, Albay, Northern Samar, Agusan del Norte, Agusan del Sur, ug Surigao del Sur.
Samtang wala pa mahatagi og permiso ang komersyal nga paggamit sa bakuna, mipahayag ang National Federation of Hog Farmers nga nagpadayon ang mga lokal nga mag-uuma og lain-laing pamaagi aron mapugngan ang pagkaylap sa ASF.
Matod pa, ang pag-atake sa ASF niadtong 2019 dakong epekto sa industriya sa baboy diin miresulta kini sa pagkunhod sa gidaghanon sa baboy ug nakapahinabo og bilyon-bilyong pisong kapildihan.
Base sa datos sa Philippine Statistics Authority (PSA), mikunhod og 2.9 porsyento ang produksyon sa baboy ug niabot lamang sa 1.65 milyon ka metriko tonelada niadtong 2025.
