Giplano sa Department of Agriculture o DA ang pagpataas sa taripa sa imported nga baboy.
Sumala sa mga magbababoy, kinahanglan ibalik ang mas taas nga taripa aron makakompetensya og maayo ang lokal nga produkto ug matabangan ang mga producer nga namaligya na og ubos pa sa ilang gasto sa pagpadako sa mga baboy.
Apan sumala usab sa Meat Importers and Traders Association, posible kini nga makadugang sa presyo sa pagkaon tungod kay kulang pa ang lokal nga supply sa baboy ug wala pa kini makabalik sa normal nga lebel sa wala pa miigo ang African swine fever o ASF.
Matod sa DA, gisugyot nga pasakaan og 10 percentage points ang taripa sa imported pork sa 2027 ug ibalik kini sa mas taas nga lebel pagsulod sa 2028.
Dugang pa sa ahensya, gipataas usab sa gobyerno ang volume sa pork nga mahimong ma-import aron dili magkakulang ang supply ug mapabilin nga kontrolado ang presyo.
Sa pinakabag-ong datos sa DA, mikunhod ngadto sa P150 kada kilo ang farmgate price sa baboy niadtong Agosto 2026, gikan sa P215 kada kilo niadtong Hunyo 2025, samtang milapas sa 602 million ka kilo ang imported nga baboy gikan Enero hangtod Agosto ning tuiga.
