Nagduso ang Department of Agriculture (DA) og plano nga ibalik ang pipila sa mga nag-unang regulatory powers sa National Food Authority (NFA).
Kini pinaagi sa pag-amenda sa kasamtangang Rice Tariffication Law (RTL) nga gitumong sa pagpalig-on sa katakos sa NFA sa pagtuman sa mandato niini sa pagsiguro sa food security sa nasud kon bugas ang hisgutan.
Hinuon, importanteng i-klaro nga ang gisugyot nga amendment wala maglakip sa paghatag sa NFA og gahom sa direktang pag-import og bugas.
Matod ni Agriculture Secretary Francisco Tiu Laurel Jr., magpabilin gihapon ang importasyon sa bugas sa kamot sa pribadong sektor. Kini aron mapadayon ang kompetisyon sa merkado ug malikayan ang posibleng pagkontrolar sa gobyerno sa presyo sa bugas.
Dugang niya nga bisan ang pribadong sektor maoy mo dumala sa importasyon, kinahanglang tumanon nila ang ilang responsibilidad sa pagmintina sa igong reserba sa bugas sa nasud.
Importante kini nga bahin sa lakang aron masiguro nga adunay igong suplay sa bugas sa tanang panahon, ilabi na sa panahon sa kalamidad o kakulang.
