Nagpondo og P35 milyon ang Department of Agriculture (DA) alang sa paggamit og mga kemikal ug drone operations aron mapugngan ang pagkatap sa red-striped soft scale insect (RSSI), usa ka peste nga naghulga sa industriya sa asukal sa Pilipinas, ilabi na sa Negros Island ug Western Visayas. Matud sa DA, gamiton ang mga drone sa pag-spray sa mga apektadong umahan sa tubo.
Sa unang hugna, target nga maabot ang 25,000 ka ektarya nga mga tanoman sa tubo, ug mahimo pa kining madugangan ngadto sa 45,000 ka ektarya kung mosamot ang pagkatap sa peste.
Sumala ni Agriculture Secretary Francisco Tiu Laurel Jr., kinahanglan nga mapanalipdan ang industriya sa asukal tungod kay daghang mga mag-uuma, mamumuo, ug ilang mga pamilya ang nagsalig niini.
Gipasabot sa DA nga ang RSSI usa ka klase sa peste nga mosuyop sa duga sa tanom nga tubo, hinungdan nga maluya ang pagtubo niini.
Magresulta usab kini sa pagtubo sa itom nga amag sa mga dahon nga makababag sa pagsulod sa kahayag sa adlaw nga gikinahanglan sa tanom aron motubo pag-ayo.
Tungod niini, mahimong mokunhod ang ani sa tubo ug ang gidaghanon sa asukal nga makuha gikan niini.
Base sa datos sa DA, sa 421,606 ka ektarya nga gitamnan og tubo sa tibuok nasud karong ani nga panahon, 93,898 ka ektarya na ang naapektuhan sa RSSI. Gani, 92,295 ka ektarya niini anaa sa Negros Island ug Western Visayas.
