Gisuportahan sa Department of Agriculture o DA ang gisugyot nga P210 kada kilo nga minimum farmgate price sa buhing baboy aron matabangan ang mga nagbuhi og baboy nga naapektuhan sa pag-ubos sa presyo.
Matud sa DA, miubos na sa P120 hangtod P160 kada kilo ang presyo nga nadawat sa mga nagbuhi og baboy sa pipila ka lugar, nga mas ubos kon itandi sa ilang gasto sa pagbuhi sa baboy.
Gipaklaro ni Agriculture Secretary Francisco Tiu Laurel Jr. nga gikan sa sektor sa mga magbababoy ang sugyot nga P210 pesos kada kilo ug dili kini direktang gisugyot sa DA.
Bisan pa niini, giingong suportado sa departamento ang maong sugyot isip lakang aron maprotektahan ang panginabuhian sa mga nagbuhi og baboy.
Apan sa pagkakaron, wala pay legal nga awtoridad ang DA aron magpatuman og mandatoryong ‘minimum farmgate price’ sa buhing baboy.
Gitan-aw usab sa departamento ang ubang lakang sama sa pagpalig-on sa proteksyon batok sa sobra nga pag-import sa baboy aron matabangan ang lokal nga industriya.
