DA, magrekomenda og temporaryo nga pagpahunong sa rice importation og mas taas nga taripa

Girekomenda sa Department of Agriculture (DA) kang Pangulong Ferdinand R. Marcos Jr. nga temporaryo nga ihunong ang pag-import og bugas ug patas-an ang taripa sa imported rice aron maprotektahan ang lokal nga mga mag-uuma.

Matod kang Presidential Communications Office Secretary Dave Gomez, tukion sa Gabinete ang maong isyu sa sidelines sa state visit sa Pangulo sa India gikan Agosto 4 hangtod 8.

Wala pay gihatag nga detalye kabahin sa ensaktong pagsaka sa taripa o kung unsa kadugay ang plano nga pagsuspenso sa pag-import og bugas.

Girekomenda usab sa Philippine Council for Agriculture and Fisheries ang subling pagpatuman og 35% nga taripa sa imported rice aron mapabilin nga ‘competitive’ ang presyo sa lokal nga bugas sa nasod.