DA imbestigahan na ang taho nga ginabaligya nga bugas nga adunay bukbok

Molusad og imbestigasyon ang Department of Agriculture (DA) sa nadawat nilang reklamo nga adunay ‘bukbok’ nga nakit-an sa bugas nga gibaligya sa mga merkado sa Kadiwa sa Quezon City.

Matod sa tigpamaba sa DA nga si Arnel de Mesa, ilang susihon pag-ayo kung nakaagi ba sa makuting eksaminasyon ang mga bugas nga gibaligya sa Murphy Market sa Quezon City.

Gitataw niini nga makonsidera nga isolated case ang nasangpit nga insidente tungod mao ra kini ang ilang nadawat nga insidente.

Iyang gipaneguro nga maayo ang kalidad sa mga bugas gikan sa mga bodega sa National Food Authority (NFA) una pa kini ibaligya sa nagkadaiyang merkado sa nasod.