Gisiguro sa Department of Agriculture nga adunay paigong suplay sa bugas ug nagpabiling stable ang presyo sa maong produkto.
Gihimo sa ahensiya ang pagsiguro luyo sa pagkwestyon sa Federation of Free Farmers (FFF) sa discrepancies sa datos sa produksiyon sa bugas ug imbentaryo nga gipagawas sa Philippine Statistics Authority nga posibleng nagpasabot matud pa sa nipis nga suplay sa mga musunod nga bulan.
Gihingusgan usab ni Agriculture Assistant Secretary ug Spokesperson Arnel De Mesa nga tanan sa datos nga gigamit sa DA ang base sa official figures gikan sa PSA kung asa adunay 1.64 milyon nga metrikong tonelada nga imbentaryo sa unang kwarter sa tuig.
Aduna usab ‘production data’ nga 4.69 million metric tons sa humay ug adunay 3.02 million MT nga bugas ingon man ang mga giangkat pa nga bugas kung asa miabot sa 1.1 million MT ang imported rice niadtong first quarter.
Gipaklaro usab sa DA official nga base sa ilang pagbanabana, adunay 60 hangtud 66 ka adlaw nga rice stock inventory sa pagtapos sa unang kwarter hinungdan aduna matud pay paigong suplay hangtud sa lean seaon sa tunga-tunga sa Agosto hangtud sa tunga-tunga sa Setyembre una ang musunod nga ani alang sa wet season.
Nagpabilin usab nga stable ang retail price sa bugas tali sa P48 ug P53 kada kilo alang sa well-milled rice samtang ang prevailing price usab ang gikan P50 hangtud P52 matag kilo.
