Hugot nga gibantayan sa Department of Agriculture (DA) ang suplay sa mga utanon sa kabukiran karon nga gibati na ang epekto sa Super Typhoon Nando.
Matud pa ni DA Spokesperson ug Assistant Secretary Arnel de Mesa, adunay posibilidad nga magkulang ang suplay sa mga utanon gikan sa La Trinidad, Benguet tungod kay daghang mga plantasyon didto ang nangaguba.
Si De Mesa niingon nga dili angay pahimuslan sa mga magpapatigayon ang maong sitwasyon tungod kay ang posibleng problema mao lang ang volume o gidaghanon sa mga utanon, apan abli gihapon ang mga ruta sa pag-eksport sa mga highland vegetables.
Lakip sa mga utanon nga gikuha gikan sa Benguet mao ang repolyo, patatas, carrots, sayote, broccoli, ug uban pa.
Dugang pa ni De Mesa nga ang mga liso sa utanon naka-preposition na ug iapud-apod sa mga apektadong mag-uuma.
Gimandoan usab sa DA ang National Food Authority (NFA) nga ipagawas ang 2 milyon ka sako sa stock sa bugas niini aron matabangan ang mga mag-uuma ug ilang mga pamilya nga naapektuhan sa bagyo.
Andam usab ang pondo alang sa crop insurance aron mabayran ang mga mag-uuma nga nawad-an sa ilang mga pananom.
