Gipaniguro sa pamunoan sa Department of Agriculture nga magpadayon ang ilang operasyon batok sa mga smuggler sa agrikultura sa nasud.
Kalabot niini, gikompirma sa ahensya nga ila nang ipadala ang mga nakumpiska nga bombay sa Mindanao International Container Terminal nga nagpositibo sa E. coli bacteria.
Ang nasangpit nga mga produkto nasakmit niadtong Hunyo ning tuiga ug gipaubos dayon sa testing.
Matod ni Agri Secretary Francisco Tiu-Laurel Jr., nasuta nga taas ang lebel sa E.coli nga nagpasabot nga kontaminado kini.
Tumong niini nga lakang mao ang pagpugong sa publiko sa pagkonsumo sa maong mga produkto ug sa pagpugong niini sa pagkatag sa mga merkado.
Mahimo kini nga peligro sa kahimsog sa tawo kung gikaon.
Lakip sa posibleng negatibong epekto mao ang grabeng pagsakit sa tiyan ug uban pang seryosong kaso nga mahimong mosangpot sa kamatayon sa indibidwal nga mokaon niini.
