Gibawi na sa Department of Agriculture (DA) ang temporaryong pagdili sa pag-import sa manok gikan sa Netherlands.
Kini nga desisyon miabot pipila ka bulan human gibabagan sa DA ang pagsulod sa mga produkto sama sa manok, wild birds, karne sa manok, piso, itlog, ug semilya gikan sa maong nasod tungod sa taho nga adunay bird flu outbreak didto kaniadtong Nobyembre sa miaging tuig.
Ang Memorandum Order No. 31 nga nagpawagtang sa maong ban gipirmahan mismo ni Agriculture Secretary Francisco Tiu Laurel Jr. human makumpirma sa mga internasyonal nga ahensya sa kahimsog sa mga hayop nga ang Netherlands wala na’y kaso sa Highly Pathogenic Avian Influenza (HPAI).
Gipasabot usab sa DA nga sukad pa sa tunga-tunga sa Mayo, wala nay bagong natala nga kaso sa maong sakit.
Epektibo dayon ang mando ug magpadayon kini hangtod kini balikon o masuspenso pag-usab.
Tungod sa pag-abli pag-usab sa koneksyon sa usa sa mga nanguna nga poultry producers sa Europa, gilauman sa DA nga mas moayo ang availability sa mga poultry products sa lokal nga merkado ug mas mapadayon ang maayong pagdumala sa supply sulod sa nasud.
