GENERAL SANTOS CITY – Temporaryo nga gisuspendi ang mga mass gathering dinhi sa dakbayan aron sa paglikay sa posebling local transmission sa coronavirus disease 2020.
Kini ang deklarasyon ni GenSan Mayor Ronnel Rivera sa pakighinabi kaniya sa Bombo Radyo.
Naatol kini sa pagpatuman ug localized lockdown sa Zone 7, Brgy. Bula tungod sa pagpositibo sa 62-anyos nga babaye nga residente sa lugar.
Matud sa Mayor nga angayang sundon ang mga safety protocol aron makalikay sa makamatay nga sakit samtang padayon ang pagpahigayon ug contact tracing sa tanang nahimamat sa nasampit nga pasyente hangtud sa 4th level.
Sa kasamtangan matud pa aduna lamang 19 ang na-contact trace nga mga medical personnel samtang dili na tugtan nga makagawas ang mga residente sa lima ka balay nga nasulod sa compound.
Gipasalig usab niini nga adunay paigo nga suplay ang barangay sa panginahanglanon sa mga nahisgutan samtang sila naka-lockdown.
Samtang gipatuman na ang curfew sugud kagabie gikan alas 10:00 sa gabie hangtud alas 4:00 sa kaadlawon.
Nasuta nga ang GenSan ang napailawom sa Modified General Community Quarantine hangtud Agusto 31 niining tuiga.
