Malipayong gipaambit sa aktres nga si Cristine Reyes nga engaged na siya sa iyang partner nga si Gio Tingson.
Sa iyang Instagram post, gipaambit ni Cristine ang pipila ka mga litrato nila ni Gio, lakip na ang usa ka kuha diin gipakita niya ang iyang engagement ring.
Dali nga midagsa ang mga pahalipay gikan sa ilang mga higala, kaubang artista, ug mga fans sa comment section sa post.
Kahinumduman nga ang balita sa panag-uyab ni Cristine ug Gio unang nigawas kaniadtong 2025.
Si Gio nagsilbi nga chairperson sa National Youth Commission gikan sa 2014 hangtod 2016. Siya usab ang Chief Political Officer ni Senador Bam Aquino gikan sa 2016 hangtod 2018, ug mao ang chairperson sa Akbayan Citizen’s Action Party gikan sa 2018 hangtod 2022.
Samtang, si Cristine naminyo kaniadto sa propesyonal nga MMA fighter nga si Ali Khatibi kaniadtong 2016. Sila adunay anak nga babaye, si Amarah, nga natawo kaniadtong 2015.
Kaniadtong Pebrero 2024, gikumpirma ni Cristine nga siya gi-annul na kang Ali sulod sa kapin sa usa ka tuig.
Si Cristine Reyes ug Marco Gumabao nalambigit usab niadtong panahona human sa pag-anunsyo sa ilang relasyon ug pagtapos niini kaniadtong Abril 2025.
