Suportado sa hepe sa Philippine National Police (PNP) PGen. Nicolas Torre III ang pagpasa sa usa ka balaod nga nagpaubos sa edad sa criminal liability basta kini adunay siyentipikong basehan.
Matod sa hepe, ang PNP mohatag sa ilang pormal nga baruganan bahin niini nga isyu pinaagi sa written paper ug isumite kini ngadto sa Kongreso.
Kini aron paghatag sa ilang opinyon ilabi na kung adunay mga kausaban sa mga balaod nga maglambigit sa mga kabatan-onan.
Bisan ang hepe nagpakita og suporta, siya miinsistir nga kini kinahanglan nga adunay pagsuporta sa siyentipikong basehan ug ebidensya.
Matod niya nga adunay mga pagtuon nga kinahanglang hatagan ug pagtagad kalabot sa age limits ug ang kakulang sa mga kabatan-onan ilabi na karon nga taas na sila og access sa tanang matang sa impormasyon.
Samtang, gawas sa ebidensiya base sa mga pagtuon ug siyensya, gipasiugda usab ni Torre nga kinahanglan usab nga adunay pagtuon kung diin gibase ang Republic Act 9344 o ang Juvenile Justice and Welfare Act.
