Nangayo karon si Philippine National Police (PNP) Chief PGen. Nicolas Torre III ug feedback sa kapulisan bahin sa ilang bag-ong uniporme, General Office Attire Type C (GOA C).
Kini maoy iyang pagdasig human nahimong epektibo ang paggamit sa bag-ong uniporme sugod karong adlawa.
Gipasabot sa hepe nga kinahanglang masayran kung epektibo ug komportable ba ang mga polis sa ilang bag-ong set up nga uniporme sa ilang inadlaw nga serbisyo.
Tungod niini, gitahasan dayon ni Torre ang PNP Directorate for Research and Development nga manguna sa pagdumala sa survey sa mga polis aron masayran ang ilang opinyon kalabot sa bag-ong uniporme.
Samtang, ang bag-ong uniporme adunay PNP Badge sa mga pulis nga giborda ingon man ang ilang shoulder loop.
Gipaabot nga mao na kini ang mamahimong daily office attire sa mga polis dili lang sa National Headquarters sa PNP, kon dili lakip na sa mga Police Provincial Offices, City Police Offices, Police District Offices ug bisan sa mga police station ug uban pang units.
