Gibarugan si Philippine National Police (PNP) Chief PGen. Nicolas Torre III nga dili na mausab ang mga kaso sa pagpatay o extra-judicial killings nga nahitabo sa miaging administrasyon, nga gigamit kaniadto isip paagi sa pagsumpo sa kriminalidad, ilabi na ang iligal nga droga sa nasod.
Gibutyag ni Torre nga iyang gikondena ang mga pagpatay ug wala usab siya nagdasig sa mga kapulisan nga buhaton ang ingon niini nga kalihokan aron lamang makadakop og daghan.
Matod pa niya, kon mobiya ang mga pulis sa proseso sa hustisya, mahimo silang isipon nga kriminal, imbes nga sila unta ang tigpanalipod sa balaod ug sa katungod sa mga tawo.
Sumala pa sa PNP Chief nga bisan kinsa nga mosupak sa maong mando, moatubang sumala pa sa angayang silot ug imbestigasyon uban sa tabang sa Commission on Human Rights (CHR).
Sa laing bahin, gipaklaro usab ni Torre nga ang paggamit sa pwersa kinahanglan mahimong katapusan nga opsyon sa mga pulis, ilabi na kon aduna nay hulga sa ilang seguridad o sa seguridad sa publiko.
Matod pa niya, kon adunay dakpon, posible gyud nga mosukol ang suspetsado, ug sa ingon niini nga kahimtang adunay katungod ang mga pulis sa pagpanalipod sa ilang kaugalingon ubos sa Article 11 isip self-defense.
Gipasabot usab sa opisyal nga tugotan lamang ang paggamit og pwersa kon sa tan-aw sa mga nagresponde nga anaa na sa peligro ang ilang kinabuhi sa dihang nagdakop sila.
Sa laing bahin, gihatagan og gibug-aton sa heneral nga kabahin gayud sa ilang serbisyong gipanumpaan ang pag-aresto ug pagdakop sa mga kriminal, apan dili kini mahimong hinungdan nga malapas ang katungod sa mga tawo.
