GENERAL SANTOS CITY – Mas gipalapdan karon sa probinsya sa Sarangani ang testing aron makit-an ang mga nagpositibo sa COVID 19.
Matud pa ni Dr. Arvin Alejandro, provincial health officer sa Sarangani Province nga kini ang rason nganong sukad sa miaging mga semana daghan ang natala nga kaso sa COVID 19 sa probinsya.
Gihimong ehemplo niini ang nahitabo sa usa ka kompanya sa Alabel nga kapin sa 1,000 ka empleyado ang gipailawom sa antigen test nasuta nga kapin sa 60 ang ang nagpositibo.
Ang tanan nga positibo sa antigen test ang ipailawom sa RT-PCR test aron makumpirma kung natakdan sa virus.
Sa pagkakaron ang target nga ipailawom sa expanded testing ang mga empleyado, mananagat, mga gwardya og kadtong mga daghang giatubang mga mga customers kada adlaw.
Miapila usab si Dr. Alejandro sa katawhan sa Sarangani nga kung may gibati sa kaugalingon pwede magpailawom sa libre nga covid testing nga makig-alayon sa matag Rural Health Unit.
Gatuo si Dr. Alejandro nga kasagaran sa mga nagpositibo sa COVID 19 ang mga assymptomatic kung asa mas daghan pa ang matakdan kung wala nasayran nga positibo sa maong virus.
