GENERAL SANTOS CITY – Nadugangan ang napatay tungod sa coronavirus disease sa Socsksargen, usa ka gabie una ang pagsaulog sa Pasko.
Basi sa December 23 case bulletin sa DOH-12, nakabsan sa kinabuhi kagahapong adlawa ang usa ka 40 anyos nga lalaki nga taga GenSan.
Ang nasampit ika-4,450 nga natalang kaso sa sa covid 19 sa rehiyon nga ang hinungdan sa kamatayon tungod sa Cardiogenic Shock Secondary to Acute Coronary Syndrome Killips IV, Diabetes Mellitus Type 2, Hypertension II, Community Acquired Pneumonia High Risk with Hypercapnia, Acute Respiratory Failure, Pneumonia Covid Positive.
Tungod niini mukabat na sa 56 ang covid 19 related death sa GenSan. Samtang wala na usab makaabot og Pasko ang 72 anyos nga babaye nga residente sa Alabel Sarangani Province human nga migrabe ang kahimtang samtang nagsakit tungod sa covid 19.
Nahunusan sa kinabuhi kagahapon ang ika-4,401 nga natalang kumpirmadong kaso sa covid 19.
Namatay kini tungod sa acute Respiratory Failure Secondary to Community Acquired Pneumonia High Risk.
Hinungdan nga misaka na sa 15 ang nakabsan sa kinabuhi sa Sarangani tungod sa covid 19.
Sa karon, mukabat na sa 159 ang natalang namatay sa katibuk-ang rehiyon.
