GENSAN – Mipasalig si Congresswoman Shirlyn Bañas-Nograles sa lig-on nga pagpanalipod sa sektor sa panagat atol sa iyang pag-atubang sa Committee on Aquaculture and Fisheries Resources, diin iyang gisponsoran ang House Bill 937 nga nagtumong sa pagtukod sa Department of Fisheries Resources.
Matud niya, bisan pa sa kadagaya sa kadagatan sa nasud, nagpabiling labing kabus ang mga mananagat sulod sa kapin walo ka dekada, nga adunay 27.4% poverty incidence, usa ka kahimtang nga nagpadayag sa dugay nang kakulang sa prayoridad ug proteksyon sa maonmg sektor.
Gipasiugda usab niya ang nakagrabeng pagkunhod sa dinakop nga isda ug ang padayon nga ilegal nga pagpangisda nga naghulga sa seguridad sa pagkaon ug sa panginabuhian sa mga komunidad sa baybayon.
Sumala kang Cong. Bañas ang pagtukod sa isa ka bulag nga departamento dili pagpadako sa burukrasya kondili usa ka estratehikong lakang aron matutokan ang paglambo sa pangisda ug pagsaka sa kahimtang sa mga mananagat.
Nanawagan usab ang kongresista og lig-on nga suporta aron masiguro ang malungtarong kauswagan sa Gensan ug tibuok nasod.
