GENERAL SANTOS CITY- Nagpaklaro si South Cotabato First District Rep. Pedro Acharon Jr. kalabot sa pagboto pabor sa House Bill 4727 o Death Penalty Bill.
Sumala pa nga gihimo niining basehan ang nakita nga dakong pagkunhod sa krimenalidad hilabi na sa sa SOCCSKSARGEN area, gumikan sa mas gipakusgan nga anti-drug campaign sa gobyerno, sa unang unom ka bulan sa kasamtangang administrasyon.
Giusa-usa pa niini ang pito ka drug-related situations nga mahimong silutan ug kamatayon, base sa naaprubahang balaodnun sa Kamara.
Una niini mao ang pag-import ug iligal nga droga, ikaduha ang pagbaligya, ikatulo ang pag-manufacture o pag-angkon ug shabu laboratory, ika-upat ang pagmintina ug drug den, ikalima ang misappropriation o pag-recycle sa mga nakumpiska nga iligal nga droga sa mga anti-drug operations nga sagad gikalambigitan sa mga kapulisan o mga operatiba nga nagpahigayon ug susamang operasyon.
Ang ika-unom mao ang planting o pagtanom ug ebidensya sa mga target, samtang ang ikapito mao ang murder o pagpatay tungod sa impluwensya sa iligal nga droga.
Gatuo usab si Rep. Acharon nga kon ugaling lakip gihapon ang ubang kaso sama sa rape, plunder ug treason, posibleng nadugayan pa una maaprubahan ang sugyot balaodnun nga subling pagbuhi sa death penalty sa Kamara.
