Gitaktak na sa katungdanan si Commissioner Reymar Mansilungan sa Senior Citizens Commission sa Malacañang kalabot sa reklamong serious dishonesty, grave misconduct ug conduct prejudicial to the best interest of the service.
Ang dismissal gipahamtang ni Executive Secretary Lucas Bersamin human napamatud-an ang mga reklamo nga gipasaka batok sa kanhi opisyal.
Matud ni Bersamin nga ang mga opisyal ug empleyado sa gobyerno kinahanglang magpabiling matinud-anon ug mosunod sa mandato nga anaa sa Code of Conduct and Ethical Standards for Public Officials and Employees.
Matod niya ang integridad importante alang niadtong anaa sa gobyerno ug walay luna alang sa bisan kinsa nga moapil sa pagkadili matinuoron.
Kaniadto gisuspenso ni Bersamin ang Mansilungan niadtong Pebrero 2024, gumikan sa reklamo nga gisang-at sa usa ka Miguelito Garcia, sama sa sayop nga representasyon sa iyang background sa edukasyon sa iyang aplikasyon isip NCSC Commissioner ug giingong migamit sa kuwarta sa gobyerno sa pag-abang og opisina sa Lucena City apan nadiskubrehan nga usa kini ka residential building ug walay opisyal nga resibo.
Giingong gigamit usab sa gitangtang nga opisyal ang pondo sa pagbansay sa NCSC alang sa personal nga gasto sama sa pagkaon ug ilimnon nga makahubog ug naghatag mga bonus sa tungatunga sa tuig sa kontrata sa mga empleyado sa serbisyo.
