Gihingusgan karon sa Commission on Elections (COMELEC) Sarangani ang kamahinungdanaon sa dili paglangan sa pagparehistro isip preparasyon sa umaabot nga Barangay ug Sangguniang Kabataan Elections karong 2026.
Sumala ni Provincial Election Supervisor Atty. April Mitchor-Miguel, nagpadayon ang cycle of registration nga gisugdan niadtong Oktubre 2025 ug molungtad hangtod Mayo 2026. Ilang tinguha nga mas daghang mga kabatan-onan ug mga wala pay rehistro ang malista aron makabotar ug makapahimulos sa ilang katungod sa piniliay.
Gipasabot ni Miguel nga magsugod usab sunod tuig ang ERP hearing, diin susihon ug aprubahan ang tanang narecieve ug naprosesong aplikasyon — lakip na ang regular registration, pagbalhin sa polling place, ug aplikasyon sa SK voters.
Bukas ang COMELEC Sarangani gikan Lunes hangtod Sabado, alas 8 sa buntag hangtod alas 5 sa hapon, apil na ang mga holiday, aron walay mabutang sa alanganin nga dili makasumite sa ilang dokumento. Nagpasalig ang buhatan sa mas paspas, hapsay ug komprehensibong proseso sa registration aron ma-akomodar ang tanang gustong moapil sa eleksiyon.
Panawagan sa COMELEC nga iuna ang pagparehistro karon pa lang aron masiguro nga makalahutay ang iyong pangalan sa listahan sa mga botante sa 2026—usa ka lakang padulong sa mas lig-on ug representatibong demokrasya sa Sarangani.
