Nabalaka ang Commission on Elections (Comelec) sa giingong kaylap nga kampanya sa disinformation nga gitumong sa pagguba sa pagsalig sa publiko sa eleksyon sa dili pa ang Mayo 12 nga piniliay.
Matod ni Comelec Chairperson George Garcia niadtong Lunes, ang disinformation nahimong dakong hulga sa integridad sa piniliay.
Sa samang higayon, gipasalig ni Garcia nga walay pagpanikas o system breach nga nahitabo sa Comelec ug nagpabiling luwas ang sensitibong datos.
Dugang ni Garcia nga nabantayan sa Comelec ang paspas nga pagkuyanap sa fake news sa social media.
Apil na niini ang sayop nga impormasyon bahin sa gikinahanglang ID sa pagbotar ug ang peke nga balita nga na-postpone ang eleksyon tungod sa init nga panahon, nga giingong gipakatap sa mga troll farm ug automated bots.
Hinuon, gipahibawo usab ni Garcia nga luwas ang vote counting machines ug dili maimpluwensyahan, busa walay angay ikahadlok ang publiko.
