Gipanglantawan karon sa Commission on Elections (Comelec) ang siyam ka mga kontraktor nga giingong nakatampo sa campaign fund sa mga kandidato nga midagan niadtong Mayo 2025.
Matod ni Comelec Chairperson George Garcia, ang posibleng ilegal nga kontribusyon gisusi karon sa Political Finance and Affairs Department (PFAD) sa poll body human gisusi ang Statements of Contributions and Expenditures (SOCEs) sa mga midagan sa miaging piniliay.
Hinuon, wala gibutyag ni Garcia kon nidaog o napildi ba kining mga nasudnong kandidato sa eleksyon niadtong Mayo 12.
Gitataw usab ni Garcia nga ilang gipaabot nga mahuman ang imbestigasyon karong buwana.
Ang Comelec nakaila kaniadto og 55 ka posibleng gidili nga mga contributor sa 2022 nga eleksyon.
Sa laing bahin, si Garcia niingon nga ilang gipaabot nga ang PFAD mopagawas sa ilang rekomendasyon ngadto sa Comelec Law Department sulod sa duha ka semana, labot na sa kaso ni contractor Lawrence Lubiano, ang presidente sa Centerways Construction and Development Inc., kinsa miamot og P30 milyones sa pagka-senador ni Senador Francis Escudero sa 2022 elections.
Human makasumiter ang PFAD sa ilang rekomendasyon, nidugang si Garcia nga ang Comelec Law Department mohimo og preliminary investigation sa dili pa mosumitir sa ilang kaugalingong findings ngadto sa Commission en banc, nga maoy mopagawas og desisyon kon ang mga kasong kriminal kinahanglang ipasaka sa Regional Trial Court.
