Mu imprenta pag usab ang Commission on Elections (COMELEC) sa kapin sa unom ka milyon ka mga balota alang sa national ug lokal election.
Kini human gipahunong sa Korte Suprema ang pag-imprenta tungod sa gipagawas nga restraining order human gipugngan sa Comelec ang lima ka mga kandidato nga makasalmot sa piniliay.
Matud ni Comelec Spokesperson Atty. John Rex Laudiangco nga ilahang gipahunong ang tanang kalihokan sa pag-imprenta sa mga balota.
Gitun-an na usab sa ilang information technology department ang mga kausaban sa database sa ilang kandidato tungod natangtang ang uban ug usbon ang election management system.
Gidugang niini nga dili lang ang pag-imprenta ang gikansela apan bisan ang gikatakda nga mock election sa Enero 18 gikansela usab.
Mohimo na ang Comelec og 1,667 ka bag-ong ballot page templates diin ila kining i-serial number ug i-reprint ang laing unom ka milyon nga balota.
Bisan ang tibuok nga programa sa sistema sa Automated Counting Machine (ACM) mausab.
Motuman lang sila sa mando sa Korte Suprema kon doblehon nila ang oras aron maabot ang deadline sa pag-imprenta sa balota.
Kahinumdoman nga niisyu og TRO ang SC tungod sa wala pag-apil sa mga kandidato sa COMELEC nga sila Subair Guinthum Mustapha ug Charles Savellano nga gideklara nga nuisance candidates sa pagka-senador sa Senado ug Representante sa Unang Distrito sa Ilocos Sur; annulment sa certificates of candidacy ni Chito Bulatao Balintay nga nagpapili pagka Gobernador sa Zambales ug Florendo de Ramos Ritualo, Jr. isip Sangguniang Panlungsod Member sa unang distrito sa San Juan City ug disqualification ni Edgar Erice isip Representante sa ikaduhang distrito sa Caloocan City.
