GENSAN – Nagpadayon ang voter registration sa Commission on Elections o COMELEC sa Region 12 alang sa mga wala pa makaparehistro nga mga botante.
Sumala kang Atty. April Melchor-Miguel sa opisina sa COMELEC sa General Santos, magpadayon ang registration hangtod sa Mayo 26, 2026. Aniya, naa na karon sa ikaduhang quarter ang proseso ug dili na kini palugwayan o i-extend.
Gipasabot ni Melchor-Miguel nga wala nay plano ang COMELEC nga maghatag og extension tungod kay kinahanglan na silang mangandam alang sa Barangay ug Sangguniang Kabataan Elections nga ipahigayon karong Nobyembre 2, 2026. Importante matud pa niya nga masunod ang iskedyul aron dili maapektuhan ang preparasyon sa umaabot nga piniliay.
Gipahinumdoman usab sa opisyal ang publiko nga ang mga kabatan-onang nag-edad og 15 anyos hangtod ubos sa 18 anyos mahimo nang magparehistro isip SK voters. Samtang ang mga nag-edad og 18 anyos pataas mahimong magparehistro isip regular voters.
Gidasig sa COMELEC ang tanang kwalipikadong indibidwal nga magparehistro na samtang sayo pa aron malikayan ang dagsa sa mga aplikante sa ulahing mga adlaw sa registration.
