Gimando ni Italy Culture Minister Alessandro Giuli nga palawigon ang adlaw sa pagsirado sa bantog nga Colosseum sa Italy isip paghatag og respeto sa namatay nga empleyado.
Nasayran nga nahulog ang 22-anyos nga technician gikan sa gitas-on nga mokabat og napulo ka metros samtang nagkabit og bag-ong lighting system sulod sa karaang Roman arena.
Sumala sa Italian Culture Minister, nakurat sila ug dili gihapon makatuo sa nahitabo.
Magpabiling sirado ang bahin sa second tier sa Colosseum Archaeological Park diin nahitabo ang insidente aron hatagan og higayon ang pagbangutan.
Nailhan ang Colosseum isip usa sa mga bantog nga tourist attraction ug kinadak-ang amphitheater sa Roman Empire.
Gibanabanang 2,000 ka tuig na sukad gitukod ang Colosseum, diin kaniadto gipahigayon ang mga away sa gladiator, pagpatay isip silot ug pagpangayam og mga mananap.
