Gikumpirma sa kanhing bodyguard driver ni kanhi Pres. Rodfrigo Duterte nga “Superman” ang call sign sa kanhi mayor sa Davao city .
Ang gisulti sa retiradong pulis nga si Sanson Buenaventura daw nagpamatuod sa mga pamahayag sa pipila ka personalidad sama sa mga kanhi sakop sa gikahadlokang Davao Death Squad (DDS).
Si Buenaventura, kinsa bodyguard ug driver ni Duterte niadtong 1988 hangtod 2008, gipangutana ni Batangas 2nd District Rep. Gerville “Jinky Bitrics” Luistro sa iyang pagtambong sa Quad Committee hearing sa House of Representatives niadtong Huwebes.
Matud ni Buenaventura nga pipila ka grupo sa Davao City ang nagtawag kang Duterte Superman.
Sa pagpangutana ni Luistro, si Buenaventura niingon nga wala siyay nahibal-an bahin sa giingong DDS ug ang media lang ang mihimo niini nga tawag.
Gipahinumdoman ni Luistro ang pamahayag ni Duterte sa Senate hearing diin niingon siya nga dunay DDS.
Sa pangutana ni Luistro, si Buenaventura niangkon nga loyal siya kang Duterte.
Ang ngalan ni Buenaventura nahisgotan sa makadaghang higayon sa mga testimonya sa nagkadaiyang mga tawo nga namulong may kalabotan sa DDS.
Ang self-confessed DDS hitman Arturo Lascañas, sa iyang 2017 affidavit, niingon nga si Buenaventura adunay dakong papel sa DDS ug maoy responsable sa logistics ug finance ug nagsilbing liaison sa pagpaabot sa mga mando ni Duterte.
Matod ni Lascañas, si Buenaventura maoy nagpaubos sa mando ni Duterte sama sa mga indibidwal nga pamatyon.
Sa affidavit sa usa ka “Jose Basilio” gihulagway niini nga si Buenaventura ang operational nga “big boss” sa Heinous Crime Investigation Section, kinsa giingong maoy nagpaluyo sa clearance sa DDS operation nga target sa mga kriminal.
Matod ni Basilio nga ang mga mando gikan kang Buenaventura gituohan nga gikan kang Duterte maong gisunod kini sa mga sakop sa DDS.
Gihisgotan usab ni kanhi Philippine Charity Sweepstakes Office General Manager Royina Garma si Buenaventura nga giingong mohatag siya og P20,000 nga reward sa mga station commander sa matag drug suspect nga ilang mapatay.
