GENSAN – Ang Commission on Audit lamang ang adunay katungod sa paghatag og klarong hukom kon adunay sayop sa paggasto o pagdumala sa confidential funds sa gobyerno.
Kini ang giingon ni Atty. Rogelio Garcia, nga nagpatin-aw nga dili ang katawhan o ang opinyon sa publiko ang basihan sa paghusga kon mali ba ang paggamit ni Vice President Sara Duterte sa maong pondo, kondili ang COA ra gyud.
Matod pa ni Garcia, hangtod karon wala pay nakit-ang paglapas ang COA sa paggasto sa confidential funds nga gipasangil nga P125 milyones kaniadto, lakip na ang karon nga P625 milyones nga budget sa Department of Education.
Iyang giingon nga walay opisyal nga finding gikan sa COA nga nagpakita og iregularidad sa maong pondo.
Kini nga pahayag gihimo taliwala sa nagkadaghang reklamo nga giatubang ni Vice President Sara Duterte sa Office of the Ombudsman.
Lakip sa mga kasong gi-file batok kaniya ang plunder, graft and corruption, betrayal of public trust, malversation ug uban pang alegasyon nga gisang-at sa pipila ka lider sa civil society groups.
