Giinsistir ni Senator Panfilo “Ping” Lacson nga kinahanglan unta nga mas lawom pa ang pagsusi sa Commission on Audit o COA sa paggamit og mga alyas, lakip na ang inspeksyon sa vault diin gitipigan ang classified information, atol sa pag-audit niini sa paggamit sa confidential funds.
Sumala kang Lacson, gilatid sa Joint Memorandum Circular No. 2015-01 ang mga pamaagi alang sa inspeksyon sa vault diin gitipigan ang classified information, lakip na ang pagberipika sa tinuod nga pagkatawo sa mga tawo nga migamit og mga alyas sa mga dokumento.
Matud ni Lacson, importante nga matino sa COA kung kinsa gyud ang mga tawo nga anaa sa luyo sa mga alyas nga migawas sa acknowledgment receipts, sama nila “Mary Grace Piattos,” “Patty Ting” ug “Andy Lim.”
Matud pa niya, mahimong gamiton ang mga alyas sa mga dokumentong may kalabotan sa confidential operations, apan kinahanglan gihapon nga adunay pamaagi aron mahibal-an ug ma-verify sa COA ang tinuod nga pagkatawo sa mga indibidwal nga mipirma sa acknowledgment receipts.
Gipunting usab ni Lacson nga kinahanglan unta nga anaa sulod sa sealed envelope ang tinuod nga ngalan sa tawo nga migamit sa alyas ug kinahanglan kini pirmado, samtang ang maong mga dokumento gitipigan sulod sa secured vault sa ahensya.
Gikuwestiyon usab sa senador kung giunsa pag-verify sa COA ang confidential fund transactions kung wala niini aktuwal nga giinspeksyon ang vault ug nagsalig lamang sa paper audit.
Samtang, gihisgutan ni Lacson ang COA Circular No. 2020-005 nga naglatid matod pa sa proseso alang sa fraud audit investigation.
Sumala sa senador, mahimong magpahigayon ang COA og fraud audit investigation kung adunay impormasyon nga posibleng adunay nahitabong fraud o pagpanglimbong, nga mahimong bahin sa proseso padulong sa posibleng criminal case.
Tungod niini, giingon ni Lacson nga kinahanglan usab pangutan-on kung nganong wala nagpahigayon ang COA og fraud audit investigation bisan pa sa mga impormasyon nga migawas atol sa pagsusi sa confidential funds.
Sa impeachment trial niaging semana, gisugyot na ni Lacson ang pag-amendar sa Joint Memorandum sa COA tungod kay kulang matod kini sa tukmang detalye kung asa gigamit ang confidential funds.
Samtang, sa dihang gipangutana bahin sa obserbasyon nga adunay pipila ka senator-judge nga daw adunay pagdapig sa impeachment trial, midumili si Lacson sa pagkomento sa aksyon sa iyang mga kauban.
Giingon sa senador nga isip usa ka senator-judge, iyang likayan ang paghukom sa lihok o baruganan sa ubang miyembro sa Impeachment Court.
Bisan pa niini, iyang gipasiugda nga importante nga susihon pag-ayo kung unsa pa ang mga lakang nga gihimo sa COA gawas sa pagrepaso sa mga dokumentong gisumite alang sa audit.
