Nagmando ang Commission on Audit (COA) og fraud audit sa Department of Public Works and Highways (DPWH) flood control projects sa Bulacan nga nagkantidad og P44 bilyon, luyo sa mga isyu nga gibutyag ni Presidente Ferdinand Marcos Jr.
Nasayran nga sa kinatibuk-ang P548 bilyon nga flood control funds sa tibuok nasod, ang labing dako nga kantidad naadto sa Central Luzon (P98-B), diin ang Bulacan maoy pinakadako sa rehiyon.
Sa memo sa COA kaniadtong Agosto 12, gimando dayon ang audit investigation tungod sa mga isyu nga gihisgutan ni Presidente Marcos. Ang mga distrito sa DPWH sa rehiyon gimanduan usab sa pagsumite dayon og mga dokumento alang sa pag-audit.
Sa sayo pa, ang Presidente nagpahayag kaniadtong Agosto 11 nga ang Bulacan adunay pinakadaghang flood control projects nga adunay 668 ka mga proyekto, apan nagpabilin gihapon kini sa pinakadaghang baha nga probinsya base sa National Adaptation Plan sa 2023–2025.
Gihangyo sa PBBM ang Timothy Construction Corporation nga mopasabot human kini personal nga nag-inspeksyon kaniadtong Agosto 15, usa ka proyekto sa Calumpit, Bulacan, diin nadiskubrehan nga wala pa mahuman ang river protection structure bisan pa sa report nga nag-ingon nga kini nahuman niadtong Pebrero 2023.
