Nagrekomenda ang Commission on Audit (COA) og mas hugot nga mga lakang, lakip ang pagpugong sa suweldo og pagpahamtang sa mga silot, batok sa mga opisyal sa Department of Education (DepEd) nga napakyas sa pag-liquidate sa mga cash advances (CAs) nga nagkantidad ug Php 6.96 bilyon kaniadtong Disyembre 31, 2023.
Sa ilang 2023 Annual Audit Report, gibandera sa COA ang kapakyasan sa DepEd sa estrikto nga pagsunod sa mga balaod ug regulasyon, nga miresulta sa pagtipon sa mga CA nga wala ma-liquidate.
Ang mga nag-unang kakulangan naglakip sa paghatag sa mga CA nga walay saktong awtoridad, pagbalhin sa mga pundo tali sa mga accountable officers (AOs), kapakyasan sa pag-bond sa mga AO sa hustong paagi, ug pagbayad sa mga galastohan sama sa Service Recognition Incentives (SRI) pinaagi sa mga CA imbes sa direktang pagbayad.
Basi sa report, ang mga nag-unang rehiyon nga adunay pinakataas nga unliquidated balances naglakip;
Rehiyon VII (Central Visayas): 1.31 bilyon
Rehiyon VIII (Eastern Visayas): 1.01 bilyon
Rehiyon XII (SOCCSKSARGEN): 819.4 milyon
Rehiyon IX (Zamboanga Peninsula): 537.1 milyon
Rehiyon VI (Western Visayas): 513.9 milyones
NCR (National Capital Region): 301.9 milyones.
Aron matubag kini, girekomendar sa COA ang mosunod:
Hunongon ang paghatag og bag-ong cash advance sa mga opisyal nga adunay pending nga balanse.
Pag-isyu og demand letters sa mga aktibong empleyado aron mapugos ang pag-liquidate.
Pagpugong sa mga suweldo ug mga bayranan sa mga delinquent AOs hangtod nga ma-settle ang mga obligasyon.
Pagpahamtang og silot ubos sa mga patakaran sa Civil Service Commission (CSC) alang sa mga delays.
Isulat ang mga dormant nga account nga wala masulbad sulod sa kapin sa usa ka dekada.
Namatikdan usab sa taho nga sa pipila ka mga kaso, ang mga outstanding balances naglambigit sa mga responsableng opisyal nga miretiro, ni-resign, nag-AWOL, o mibalhin, nga nakapakomplikado pa sa proseso sa pagbawi.
