Mosulod na karong semanaha sa audit phase ang impeachment trial batok kang Bise Presidente Sara Duterte human gipakita sa miaging semana ang mga testigo nga nagpamatuod sa pagpagawas ug pag-withdraw sa P612.5 million nga confidential funds sa Office of the Vice President ug Department of Education.
Matud ni Tingog Party-list Rep. Jude Acidre, mosunod nga motungha sa impeachment court ang mga testigo gikan sa Commission on Audit aron ipasabot kung giunsa pag-audit ang confidential funds ug kung nasunod ba sa kasamtangang mga patakaran ang liquidation ug mga supporting documents nga gisumite.
Gipaabot nga unang motestigo sila ni kanhi COA State Auditor Roderick Wamil ug kasamtangang Intelligence and Confidential Funds Audit Office Supervising Auditor Celine May Del Campo.
Sunod usab nga motungha si House Legislative Information Resources Management Department Director Marivic Pareja. Matud ni Acidre, gikan sa pagsubay sa gigikanan ug pag-withdraw sa pondo, mobalhin na karon ang prosekusyon sa pangutana kung giunsa paggasto ang maong pondo ug kung husto ba kini nga na-liquidate.
Niaging semana, mitestigo ang duha ka kanhing opisyal sa Land Bank nga miingon nga ang P612.5 million nga confidential funds gikan sa National Treasury ug gi-withdraw sa kinatibuk-an pinaagi sa pito ka tseke.
Gipaabot usab nga hisgutan sa mga testigo gikan sa COA ang direktiba sa komisyon nga ibalik ang P73.287 million nga confidential funds nga gipagawas ngadto sa OVP niadtong 2022, lakip na ang mga isyu sa liquidation documents sama sa mga acknowledgment receipts nga adunay mga ngalan nga giingong hinimo-himo lamang ug uban pang mga iregularidad nga unang nabutyag sa imbestigasyon sa Kamara.
